مقالات

#مكعبات_سكر .. نتائج الشهادة الثانويّة

الإعلان عن نتائج  الشهادة الثانوية حتى وأنا لا أعرف شخصاً مُقرباً مني نجح فيها وتجاوزها يُعد أمراً محفّزاً جداً لي، لقد أيقظ في داخلي أحلامي التي  كنت أحلُم بها وأنا في الثامنة عشر من عمري،  والحمد لله بعض منها تحقق ، وكل مانحقق شي تزيد أحلامي .. مش عارفة إذا كان طمع أم طموح، هذا محتاج تدوينة مستقلة 😊 ذكروني بيها 

عندي هلبة حاجات خاطري نقولها بمناسبة شعوري بالحماسة لنتائج الثانويّة وقررت نغيّر اليوم ومانكتبش بالفصحى 😊

أول حاجة  مش مُهم البنات كلهم يطلعوا شاطرات ونفس مستوى التفوق وينجحوا تقدير ممتاز، الذكاء معاطي من ربي،  بس مُهم يكملوا تعليمهم ويكون عندهم شهادة مش لــــ “عازة الزمان” بس، لكن بش يعلموا صغارهم ويربُوا جيل جديد يحترم ويقدّر العلم والتعليم والثقافة .. أقل فائدة للأم المتعلمة أنها تُربي عقول سويّة ..ما يهزوش عالمثقف والرسام والكاتب والمتعلم ولا عاللي عنده حرفة أو صنعة في إيده ..  وركزت عالبنات أكثر لأن البنت حتى لو ما مارستش مهنة ووظيفة حتكُون أُم أو خالة أو عمّة وحتساهم في تربية المجتمع..

ثانياً.. نتمنى من كل الي نجحوا من الدور الاول أو بيعوضوا في الدور الثاني إن ما يخلوش تركيزهم على الدرجات بس، الحياة علمتنا إن في هلبا مهارات لازم واحد يتعلمها وهلبا نقاط في شخصياتنا لازم نطوروها مُهمة زي أهمية الدرجات وممكن أكثر..

daniel-watson-75027

بعد ما كبُرت عرفت إن التلميذ الشاطر مش شرط يكون أكثر واحد جمّع درجات، الشاطر هو الي يعرف يعيش ويلقى الفُرص ويعرف يختار حاجة متطابقة مع ميُوله ونقاط قوته، (وطبعاً يعرف يعيش قصدي يكون ذكي بالحلال مش بالغش والاحتيال..)

من الملاحظات الحلوة اليوم إن الترتيب الأول في التخصصين العلمي والأدبي بنات، وهذا مش غريب لأن في أغلب السنوات ومن زمان البنات مجتهدات أكثر، رغم الواجبات المنزلية الي تبدا عليهم مرات في سن مبكرة، ومع هذا بعد عشر سنوات نادراً جداً ماتلقي وحدة من هؤلاء المتفوقات واخذة مركز قيادي مُهم، مانحكيش على وزارة أو منصب حساس وكبير وخطير في وضعنا الحالي، نحكي على مركز مؤثر حتى في بلدية أو مراكز محلية أو حتى في قطاع خاص  ..

وحتى ما يكونش طموحنا كبير وتفكيرنا مثالي، مرات الغريب إنك تلقي السيدة الي عمرها اليوم خمسة وأربعين وكانت متفوقة زمان وانحرمت من الدراسة في سن 18 لأن المجتمع والظروف كانت مختلفة، تلقيها في الزمن هذا تربي في بنتها على مقاييس ومعايير زمانها، وتحاول تحط نفس الطموحات في عقل البنت .!

ممكن جيلي والأجيال الي قبلي ماخدوش فرصة كاملة نتمنّى إن الأجيال هادي تاخد فرص أحسن وربي يعطيهم الوقت الطيّب ويلقوا الفرص والخير في بلادهم ويكون خيرهم واجتهادهم لينا وفي بلادنا يارب ..

لأي استفسار عن ماورد في مكعبات سكر اليوم ممكن التواصل وأنا مستعدة لشرح أوفى 😊 خاصةً لخريجي الثانوية الجُدد والمقبلين على الحياة ..

#مكعبات_سكر هاشتاغ لتدوين الأشياء الايجابية والمحفزة وللتنبيه بأنه مازال هناك خير من حولنا دوماً..

Advertisements

One thought on “#مكعبات_سكر .. نتائج الشهادة الثانويّة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s